Хабаровск краеның Аяно-Май районындагы Мая елгасында моторлы көймә әйләнеп капланган. Фаҗига нәтиҗәсендә көймәдә булган кечкенә бала батып үлгән. Бу хакта ТАСС хәбәр итә.

Беренчел мәгълүматларга караганда, көймәдә йөртүче һәм ике пассажир булган. Ул Нелькан авылыннан агым буенча якынча 22 чакрым ераклыкта хәрәкәт иткәндә, руль белән идарә итү системасы сафтан чыккан һәм көймә капланган. Өчесе дә суга төшкән, аларның берсендә дә коткару жилеты булмаган. Олылар ярга үз көчләре белән чыккан, ә бала һәлак булган.

Әлеге факт буенча саксызлык аркасында кеше үлеменә китергән су транспортында иминлек кагыйдәләрен бозу маддәсе нигезендә җинаять эше кузгатылган. Тикшерү эшләрен Россия Тикшерү комитетының Көнчыгыш төбәкара транспорт буенча тикшерү идарәсе алып бара.